الشقاق كمان بين الأزواج والزوجات اللي بقى كل واحد فيها شايف فى التاني مصدر رزقه ، وبالمصري سبوبه يطلع منه بأي حاجة ، كل واحد بقى شايف التاني مصدر نكده وقرفه ، ومش مهم بقى البيت يتهدم على اللى فيه ، مش مهم بقى الأولاد ، ولا أي شيء ، المهم إن واحد فيهم هيقدر يأثر عليهم ويأخدهم في صفه ، من غير مشاعر ولا إحساس ، كل شيء بيتهد عشان الغباء والكبر والطمع .
كل حاجة وعكسها ، فدلوقت تلاقي إما زوج محترم جدا ومعاه زوجه عايزة قطع رقبتها ، أو زوج سيء جدا ومعاه واحدة بتخاف فيه ربنا جدا ، بقينا مصطنعين ، عشان كدا كل واحد بيدور على حلمه بره بيته ، نفسه يفرح ، نفسه حد يفهمه ويحس بيه من غير ما يطلب ، يلاقي إتصال بيقول فيه بحبك ولا وحشتني ، إهتمام من الطرفين لبعضهم .
والغريب دلوقت لما واحد بيدور على واحدة يتجوزها مقياس الإختيار دلوقت إنها لازم تكون منحلة عشان يتجوزها ، وكمان الشابة برضو بتدور على الشا الروش اللي معاه الفانوس السحري ، للأسف أن الغالب دا موجود ومطلوب ...
والمؤسف ان فيه بنات محترمة وزوجات المستقبل صالحات ومحترمات بس مشلازم تتشقلب عشان تبقى مطلوبه ، وفيه شباب محترم ومتعلم وشقيان كمان وعنده طموح يقدر يحفظ زوجته ويخاف ربنا فيها .....لكن للأسف لكل واحد فينا إتجاه مغاير ...
إحنا بجد بينقصنا الإحساس الصادق والرحمه ، بينقصنا أننا نعطي بعض فرصه نصلح ونرحم بعض ، وإن محصلش مش لازم نعيش مع بعض ننكد على بعض ، وفي الأخر كل واحد يروح لطريق تاني ، والغالب بيمشي غلط عشان الطرف التاني مش عايز يفهمه ويحس بيه ...
ولكن ورغم كل ما سبق الحمد لله بنا قصص ناجحه ، بنا حاجات حلوة كتير ، وناس طيبة وجميلة ، ورغم المر عايشين ، وبيحولوا يصلحوا ويتحملوا ويعدوا أمور كتير عشان الكيان اللي بنوه ما يتهدش ...
عشان الحياة تمشي لازم كل واحد فينا ياخد فرصه ، ومش عيب نصلح غلطنا ، ونحاول نقف من تاني رغم الصعاب ، الدنيا مش فلوس وبس ، ومش مصالح وبس ، ربنا أنعم علينا كتير بأمور كتير لازم نحاول نستفيد منها ...
وكل واحد فينا لازم يقول كلمة طيبة للتاني ، ومش لازم يطلبها ولا يموت عشان يسمعها على قبره ..................................
ربنا يهدي الحال للجميع ويصلح حال كل بيوتنا وأهلنا والأبناء والأباء والأمهات والأزواج والزوجات ...
وفوا بالحقوق لأنها ديون لن تسقط مهما طال عليها الزمن ........
